//堂堂香港嘅專業人士，跑到「自由」嘅英國做運輸工？路係自己揀嘅，留喺香港嘅市民，唯有祝佢哋一切順利，千祈唔好返轉頭囉~//

疫情之下就業形勢好艱難，除咗香港旅遊、零售業冰封，仲有一班人更加慘豬豬。就係揸住BNO居留簽證，拋低香港嘅親友同工作生活，袋晒全副身家移居英國嘅港人。根據英國港僑協會做嘅「在英港人就業調查」，609份有效問卷回覆中，只有三成五嘅受訪者成功搵到全職、兼職或者自僱工作，仲有四成六嘅受訪者仍然處於失業或者待業中喎。

喺收到嘅609份問卷當中，有超過三分二受訪者持有大學學位，而原本喺香港從事行業佔比最多嘅，係金融及保險、資訊及通訊、教育呢啲專業類別，接近55%嘅受訪者移居英國前，年收入最少都達到3.6萬英鎊，即係38萬港元，呢班人點都算係社會嘅中產、中流砥柱了啩。但佢哋喺英國做緊咩呢？調查話，移居英國之後，最多人從事嘅頭三個行業係運輸、物流及倉務、住宿及膳食服務喎。

嘩嘩嘩，寧願喺疫情高風險，經濟環境又差嘅英國做運輸工，都唔返香港做專業才俊，呢班人真係好有追求，好有骨氣。不過，路係自己揀嘅，留喺香港嘅市民，唯有祝佢哋一切順利，千祈唔好返轉頭囉。

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk