//​又話英國生活好happy，又晒食炸魚薯條、睇波相片。一班投票俾前區議員畢東尼嘅觀塘居民，同被佢拋低嘅「手足」點諗啊？//

攬炒派口講「齊上齊落」，實際上就係信佢都傻。觀塘前區議員畢東尼早前因為「健康理由」辭職兼退出政壇，之後去到英國同屋企人團聚。佢尋日喺社交網站帖文，大呻話咩咩咩以前嘅生活好艱難，做嘢做到成隻狗咁，依家就好似雀鳥般自由。仲上載一張揸車嘅自拍照，隔籬有一個類似外賣公司嘅速遞袋。睇嚟畢東尼真係覺得喺英國送外賣，都好過喺香港做區議員喎。

不過唔知係咪擔心被一班投票俾佢嘅觀塘居民，同被佢拋低嘅手足鬧爆，畢東尼呢篇帖文依家已經唔見咗。其實佢晒命都唔係第一次，舊年九龍灣麗晶花園爆發疫情，身為當區區議員嘅畢東尼就被揭身處英國吃喝玩樂。之後回港就以「健康理由」辭職，依家更將專頁名由「畢東尼區議員辦事處」改為「返英國食炸魚薯條」，成日貼炸魚薯條同現場睇波相片！嘩，晒命都唔使咁高調啩。

依家咁多著草海外嘅攬炒派抱團取暖，唔知畢東尼呢個冇義氣嘅前區議員點睇呢？佢會唔會加入打國際線呢？其實佢咁享受英國生活，不如一世享受做外賣員嘅「雀鳥般自由」囉，唔好望返轉頭喇！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk