//朱牧民早前涉嫌違反《港區國安法》被香港警方通緝，仲牙擦擦話自己係美國公民未驚過，依家被李宇軒篤灰後就急急腳辭職，係咪淆底先？//

大新聞，大新聞，非法「佔中」頭目朱耀明個仔、國安法通緝犯之一嘅美籍港人朱牧民，又令到花生價飆升啦！是咁的，上個禮拜「12港人案」被告之一嘅李宇軒認罪，控方喺法庭上爆大鑊，踢爆朱牧民有份涉案，幫手向美國參議員轉交所謂144人制裁名單。事隔唔夠幾日，朱牧民竟然辭任「香港民主委員會」總監，連辭職原因都無講，好可疑囉！

呢個叫做咩咩民主委員會嘅組織，其實係一個設喺美國華盛頓嘅反華組織。嗱嗱嗱，「香港民主委員會」過去積極推動美國，通過《香港人權及民主法案》，朱牧民作為重要推手，搞出個大頭佛之後就急急腳鬆人，諗住辭職就可以保平安咩？又話齊上齊落嘅？佢依家仲喺facebook自爆，會轉職社會運動培訓機構做訓練員，係咪想繼續搞搞震先？

仲有啊，朱牧民被指向美國轉交所謂嘅制裁名單，就被揭發有好多唔關事嘅人，包括立法會議員張宇人、負責TVB新聞及資訊的助理總經理袁志偉，就連高院法官兼選舉管理委員會主席馮驊都「榜上有名」，口講民主，依家就打壓新聞自由、選舉自由啊？朱牧民咩都唔理就照單全收，交俾美國參議員，擺明hea做囉。

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk