//睇嚟美國真係好照顧郭榮鏗，難怪佢當日喺香港玩拉布癱瘓議會期間，都要飛去美國過聖誕啦!//

咩叫做「全方位關照生活需要」？咁就要睇下美國點樣「照顧」郭榮鏗勒！是咁的，早前一家大細著草加拿大嘅郭榮鏗，終於有搞作，就係出任美國哈佛大學甘迺迪學院嘅亞洲學人，本月初仲同另一位學者共同發表文章，研究《國安法》對香港法律制度，特別係民事法律影響喎。以前喺香港都好少聽聞佢做學術研究，著咗草反而獲哈佛睇中，睇嚟郭榮鏗同美國嘅關係真係非同小可。

 究竟郭榮鏗同美國關係幾咁親密，不如回帶睇返，2018年至2019年期間，郭榮鏗1年之內去美國4次，每次都可以見到政府和政界高層，唔單止見過眾議院議長佩洛西，2019年佢主力喺立法會拉布期間，依然抽空飛去美國，同時任副總統彭斯過聖誕，去美國竟然有咁高規格接待，又真係好難令人相信佢係一般「反對派政客」囉！

 哈佛大學網頁嘅介紹，就話郭榮鏗過去「專注香港公義、人權保護及司法獨立」。但睇返佢所作所為，喺立法會內會拉布拉超過7個月，白白浪費公帑859萬，當中極多民生議題被延誤，因此被警方調查有冇觸犯公職人員行為失當罪；佢又曾經與楊岳橋、郭家麒等人聯署去信美國國會兩黨領袖，要求《香港人權與民主法案》盡快進入立法程序，當時已有人質疑佢係咪勾結外國勢力。點解郭榮鏗被美國咁重用?有消息就指，美國曾經想栽培郭榮鏗做代言人，甚至想捧佢做特首，郭榮鏗仲搵中間人向北京探路添。如今睇到佢咁得厚待，係咪令呢個消息更加可信呢?郭榮鏗係咪欠香港市民一個交代呢?

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk