//岑敖暉話，連自己咁有名有姓嘅「政治人物」都萌生呢啲念頭，可想而知正在還押、等待審判嘅「手足」有咩感受。哇哇哇，說好「案底令人生更精彩」呢？岑敖暉嘅手足們，有咩想同佢講啊？//

坐監當攞勳章嘅泛民政客，竟然有一日都會後悔？是咁的，因參與去年泛民「35+初選」，涉違反《港區國安法》嘅荃灣前區議員岑敖暉，5月再因去年6.4非法集結案而被判監6個月，喺赤柱監獄服刑已經4個月嘅佢，尋日通過社交專頁貼文，竟然話「不免有氣餒」，自問「唔知為緊乜困喺度」？甚至思考過自己係咪「做咗condom」，即係被人用完即棄喎。佢仲話，連自己咁有名有姓嘅「政治人物」都萌生出呢啲念頭，可想而知一個又一個正在還押、等待審判嘅手足有咩感受。

哇哇哇，當初一班手足被你哋班泛民話「案底令人生更精彩」嘅歪理洗腦，犯法之後鋃鐺入獄，依家岑敖暉帶頭自認做「condom」，手足們點諗啊？岑傲輝仲繼續賣慘，話監獄處於鬧市中，但好似一個「黑洞」咁，所有訊息一係隔兩星期先可以傳入嚟，一係就要簡化為30秒嘅「簡報」。喂喂喂，坐監又唔係住酒店staycation，你依家先知咩？

不過岑敖暉最後戴頭盔，話自己諗通咗，話「監也許係為自己而坐，唔使將自己『美化』、『想像』為甚麼甚麼，講到尾都係自我抉擇」。既然係咁，唯有祝佢慢慢享受坐監生活嘅精彩囉。

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk