//黃浩銘話想生個「黃絲兵團」搞社運，講到咁口響，唔好唔記得自己仲有案喺身，隨時踎監啵～//

攬炒派為咗刷存在感，真係可以去到好盡，就連「坐監」都要認叻爭第一，講緊邊個？咪就係社民連主席黃浩銘囉。是咁的，社民連五子中的岑子杰、梁國雄、吳文遠及陳皓桓，先後因為35+初選案及10.1遊行等不同案件還押監房或者入獄，剩返黃浩銘一個人暫時身處獄外。佢日前接受訪問，自恃曾三度入獄的經歷化身「坐監達人」，認晒叻咁話一早就向陳皓桓及岑子杰等「監獄初哥」，傳授所謂「監獄生活秘笈」喎。

哇哇哇，坐監經歷當做武林秘籍，攬炒派不嬲都係用呢啲歪理嚟荼毒青少年嘅喇。不過黃浩銘咁牙擦擦，點止得咁少啊。話說黃浩銘同太太去年12月新婚，牙斬斬話將來想生多啲小朋友，最好生返個「黃絲兵團」，等將來可以繼續「建設民主運動」喎！

黃浩銘咁大口氣，係咪唔記得自己身上仲揹着前年10.20九龍遊行案，被控「組織未經批准集結」及「參與未經批准集結」罪，將會喺今年8月審訊，分分鐘要「踎監」，點樣完成佢嘅開枝散葉組建「黃絲兵團」大計啊。到時「仔細老婆嫩」，見唔到，又照顧唔到，咁係一個負責任嘅男人應該做嘅嘢咩？

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk