死咗喇！真係死咗喇！無陰公，個創新及科技局，就咁畀班泛民「拉布」拉死咗喇！呢舖過唔到，唔單止啲IT人勁失望，啲網民都鬧爆泛民，梗係啦，廿一世紀度度地方都「CHER」爆創新科技架嘛，香港而家無咗個局，真係唔知第時點同人地鬥囉！

最令人火滾嘅，梗係嗰個莫乃光啦，居然夠膽同記者講，話覺得反對創科局「唔係無道理」？唔係呀化？你自己代表IT界，唔落力「CHER」行幫業界不特止，仲要講啲咁反骨嘅說話？哈，仲生安白造，話質疑CY特登為咗政治目的而製造呢個「局」，製造輿論等市民批評泛民拉布喎？你無嘢吖嘛？噏得就噏呀？

明明係你地班泛民一早講要拉布，大大聲話唔鐘意梁振英，所以要拖冧個創科局架喎！喂，男人大丈夫，做到出唔夠膽認呀？仲要老屈人？再講，個創科局一早兩年幾前、梁振英未上任前已經寫咗入份政綱度，喂，莫議員，你咁講法，咪即係話，兩年幾前CY就肯定諗到今時今日你地一定會拉布拉死個局呀？嘩，咁荒謬嘅野你都講得出？

莫議員，你搞唔掂啲泛民唔拉布，畀唔到創科局啲IT界選民係不爭事實，唔該你自己好好檢討吓，好過亂搵藉口卸膊好過啦！

Youtube影片連結：https://www.youtube.com/watch?v=t1gwT9H9q6k&feature=youtu.be