//好心岑敖暉喇，既然覺得冇做錯，點解一早又認罪呀？輸唔起咪唔好犯法囉~//

講歪理當真理，一向係反對派嘅伎倆，今次輪到岑敖暉又係咁。因參與泛民「35+初選」、涉違反《港區國安法》被還押嘅荃灣區議員岑敖暉，上星期又因為舊年六四喺維園非法集結案而被判囚六個月。佢嘅社交網站專頁今日貼出佢喺判刑前寫嘅信，話咩咩咩「雖然有心理準備，但仍然覺得好難接受」，因為「畢竟我哋嘅罪名，只不過喺六四當晚，坐喺維園舉蠟燭」啫，仲話「相對下因初選案而還押就顯得冇咁荒誕」喎。 

哇哇哇，岑敖暉既然覺得自己冇做錯，點解一早就同黃之鋒、袁嘉蔚及梁凱晴四個人乖乖認罪？依家又嚟話荒誕，好矛盾喎。而且支聯會舊年申辦六四晚會嘅時候已經俾警方反對，講明屬於高風險活動，支聯會亦都冇就警方決定上訴，即係話你哋明知而故犯。仲唔理疫情一大班人坐埋一齊，前前後後搞到逾萬人出席，呢啲只係岑敖暉口中「舉下蠟燭」咁嘅小事咩？唔好編理由幫自己開脫喇。

講完歪理，岑敖暉又打感情牌。話還押同正式服刑好唔同，唔單止見太太嘅次數變少，仲要適應「放風」時間由下午轉到上午，呢段時間心情都係惴惴不安及忐忑。好心你喇，既然咁玻璃心，當初做咩要犯法啫？只可以話，出嚟行預咗要還喇。

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk