廿一世紀，度度地方都講緊點樣攪創新、點樣攪科技，人地行前香港多多聲啦，而家居然班泛民議員係咁玩拉布，仲話响漁業發展貸款基金果度加多幾百項修訂，玩到你癲，擺明班泛民要漁民陪住創科局「攬炒」、大家都過唔到先至安樂！最好笑係阿尊貴的IT界立法會議員莫乃光，居然見住個創科局就嚟死啦，都仲可以講啲咁嘅說話？佢話喎，自己希望盡快通過，但又話自己唔會亦好難走出黎話支持剪布喎。阿莫議員，唔剪布，又點樣可以開始傾到創科局呀？講到尾係咪唔夠膽講要剪布呀？咁即係咪間接承認咗，個創科局都唔夠自己明哲補身咁重要先？

最衰係，班泛民議員厚面皮到，幾乎已經講明拉布係玩針對，玩「對人不對事」，唔信？莫乃光都認咗啦。佢話明，其實好多泛民議員自己都有講，佢哋出黎反對成立呢個局都係為咗反對梁振英。嗱嗱嗱，講到明就噚，呢班泛民似乎根本就唔聽民意，亦唔理得你哋IT界同全港市民幾咁想香港進步，誓要拖冧大家。

不過咁，查實如果唔係政府懸崖勒馬，為咗成個香港福祉，非常時期，出非常手段，暫時收返個漁業貸款基金嘅撥款申請，畀咗創科局傾咗先，撥款都肯定凍過水，至於講到創科局係生係死囉喎，咁仲要睇下泛民會唔會繼續玩嘢玩拉布？香港市民，你懂的！