白票守尾門方案，陳弘毅提出左之後，啲泛民好似梁家傑咁，講到明唔願意去傾！好啦，今次輪到泛民嘅陳文敏，同樣係法律學者，佢居然提出，白票無用，畀選民投反對票至得架嘛，之不過聽左DETAIL之後，唔知大家嘅反應，係咪即刻跌咗落地呢？陳文敏話喎，就算個特首候選人攞到最多支持票，但如果有多過「兩成」反對票，即係有超過30萬登記選民反對嘅話，都要即刻拉落馬喎？吓？呢個咩嘢「神」的邏輯嚟架？喂，根據你呢個理論，我諗立法會都好多直選議員要執包袱走啦，打個譬如，人力嘅大嚿、慢必個啲，兩成反對票相信都好容易爆標喎！就算畀美國總統奧巴馬呀，共和黨陣營要發動兩成反對票簡直係EASY JOB啦！咁咪即係美國都唔駛選總統啦！

查實阿陳文敏教授點解提到30萬選民反對數字，咁啱得咁橋，好似同你地泛民講參與佔領人數好吻合喎，唔通係計掂咗條數，泛民到時就可以動員到咁多人去否決個特首當選？個概念有無問題喎，簡單問一句，假設已經有六成人支持某個人當選，過半數啦，但少數反而係兩成人反對，就要重選甚至取消資格，呢啲少數人玩贏玩串大多數的荒謬局面，真係只有陳文敏你先諗得到啦！