「洗腦」呢兩個字近期真係HIT到爆，泛民人士遇啱有唔啱聽既嘢，一定就鬧人「洗腦」架！查實「洗人腦」果個，咩唔係泛民咩？佔領中環畀佢哋變成「義舉」，中史科目變成「赤化」，而公民黨既陳家洛，更加係「洗腦」既表表者，唔信？有證有據架！佢接受明報訪問時話，佢時時喺班上挑戰學生，問啲學生有無諗過有朝起身，五星紅旗升唔起，歷史重擔要忽然落喺佢哋身上，嘩！最激係，佢話自己有諗過做「特首」，如果有得做梗係一定做啦！呢啲咪叫做「語不驚人勢不休」嘞，咁講法，唔通佢想香港獨立成國，然後自己做埋元首？咦，咪得住，阿傑哥好似唔係咁講架喎，「呢個香港民族論係香港獨立論嘅話，我喺呢度立此存照，梁家傑係反對香港獨立！」

攪咩呀？大家都係公民黨，一個陳家洛就好似想香港獨立成國，一個梁家傑就話反對港獨，唔該講清楚好喎！究竟陳家洛代唔代表公民黨先？萬一市民以為公民黨變成鼓吹港獨既「大狀黨」，支持者紛紛離佢哋而去，到時就算傑哥點樣攪爛GAG，咩又要法治又要「蛋治」，相信到頭來畀人擲雞蛋居多囉！