嗱嗱嗱！成班泛民議員舊年一早排排企，嗌生晒要杯葛第二輪政改諮詢，有啲仲講到明就算民意支持「袋住先」，都唔會聽民意，一定否決硬個政改方案咁話。咁「尊貴」嘅議員，唔去傾已經咁鬼高調嘞，好啦，近排傳出有機會放寬入閘啦喎，有無得傾呀？車，睇下，咪又係嗰啲答案。

李卓人：「咁你『入閘』好容易、『出閘』好難，如果你要攞一半提名，根本無可能，如果喺呢個咁操控嘅情況下，根本出閘唔到嘅話，最後市民都係無得揀，所以我哋覺得咁嘅『入閘』安排係毫無意義。」

梁家傑：「與其係浪費時間，不如乾脆快捷就否決咗佢！咁我哋咪希望特區政府可以重啟嗰五步曲再嚟過囉！」

咁「尊貴」嘅議員們，你地係咪唔記得咗自己係代議士嚟架，選民選你哋入議會，俾你哋每個月逗八皮幾人工，為乜先？叫你哋袋袋平安呀？叫你哋就咁坐喺度，唔駛聽民意呀？叫你哋就算市民反對，都唔駛喺諮詢過程入面表達下抗議聲音呀？你哋咩都唔傾，嘩，年薪百萬，好易賺喎！

話人「浪費」？不如先睇下自己係咪浪費緊納稅人啲錢好過啦！