梁振英上場咁耐，有份報紙就成日話樓價升到巴巴聲，鬧CY政府「做唔到野」，哈，今次爽啦，由長實樓神講返句公道說話；長實執行董事趙國雄：「 (算不算政府推出辣招，其實是成功呢？)在行政角度來說，是成功的；其實特首都講過好多次，陳茂波都講過好多次，短期供應未立即可以改善到的時候，一定要穩住個樓價，等佢唔會再繼續上升，咁樣在這方面來講，我覺得政府是做到的。嚴格來說，過去兩年事實上沒有太大的升幅及波動。」

聽到未呀？唔信就睇數據啦，連中原城市領先指數呀，都顯示樓價在CY上場到而家累積升了兩成半，但如果睇返DONALD那五年，嘩，升左八成八咁多架！喂，仲要呢屆政府不斷搵地起樓，呢樣野連長實樓神都好同意架！

趙國雄：「事實上現在整體土地供應，住宅方面土地供應，事實上是相當緊張，我地睇返張炳良局長所講，十年有四十八萬個單位，我覺得佢係盡緊最大的努力去搵地。其實都不是，政府一定計得到個數字出來，你又唔可以話佢做唔到，我睇得到過去兩三年，佢地講既野都是做得到，好似今年來講，一手樓供應都有一萬八千多個單位，那些都是做得到，大家都是盡力做緊事，我想我地俾多些支持，等佢地容易做得到！官員做的事，都是為整體市民的福祉，所以應該俾佢地多些支持，不要經常罵他們。」

嗱！盲撐梗係唔啱架嘞，但講道理，土地呢架野，梗係要政府繼續做多啲啦！學似趙國雄話齋，起樓唔同焗麵包，唔係幾個鐘就攪得掂，要成幾年時間先起到出來架嘛，唔該大家諗清楚，係點樣搵啲地出來，好過一味反反反啦！