佔中佔咗差唔多兩個月，好多市民都頂唔順，最新民調反映出來八成幾人認為啲示威者應該快啲走啦；連佔中三子都話，下星期五去自首兼停埋秘書處運作，變相撤出佔領區啦；哈，學民學聯居然話，三子自首還自首，佢哋就肯定唔會走住架啦。

學聯常委張秀賢喺港台節目中度話喎，如果而家自首係講唔過去，因為要對場內嘅人負責任，嘩！對場內負責任？咁對場外啲市民呢？啲民情呢？學聯就唔駛負責任呀？主持人就追問，學聯你哋諗咗好鬼耐啦喎，一直無結果，莫非一直就佔落去呀？主持人仲問咗張秀賢好多次，係咪12月5日或之前有結果，一直得唔到答案；一時就講盡快，一時就講唔係12月5日；唉，真係講來都蹝氣呀，成八分鐘訪問來來回回、講來講去都講唔出幾時有個決定，抑或講到尾，學聯根本就唔夠膽大聲講，唔想退場呀？講真，你哋擺街站，都知啲市民有幾嬲你地啦，唔該學民學聯快啲懸崖勒馬，結束佔中行動啦！

影片youtube連結：http://youtu.be/vNrmxUrZ388