「佔中」兩個字講足一年零九個月，聽到就忟喇。尋日港大梁麗幗同學聯周永康又上Michael Chugani嘅節目講「佔中」，真係聽到耳都側。佢哋話喎，唔認同戴耀廷喺假期搞「佔中」，一搞就要對經濟破壞愈大愈好。主持人問啦，乜唔怕影響到一般打工仔咩？佢哋居然話「唔會嘅」，至多影響特區政府同「大企業」啫。

主持人再問，大企業咪請咗好多打工仔囉？梁麗幗就突然話，一般打工仔唔一定受影響，啲企業「感覺」到經濟威脅就夠架喇！吓？唔怪得主持人最後祝佢哋「GOOD LUCK」啦！

講真，究竟要搞大佢，定係等人感到威脅就夠呀？兩位大學生代表，連全港有幾多大學生都答唔出，不如返企做吓功課先至好出來嚟領群眾啦！