余若薇今朝喺電台話，唔接受政改要「袋住先」，因為中央成日呃人，袋咗就唔會變咁話；但當話中央唔變，咁就更加應該袋得幾多得幾多啦，余大狀又立刻轉軚，話一定唔袋，等中央知香港人唔收貨，話唔定仲「有得變」，有個更好框架喎。一時變，一時又冇得變，到底余大狀知唔知自己搬咗龍門去邊呀？

其實中央都講過好多次，普選方案一定可以改善，但前提係今次要落實先，否則就得個「桔」，下次又重新嚟過。余大狀講嘢陰聲細氣，但其實歪理連連，好誤導人架！講到底，2017年有普選，500萬選民就可以一人一票選特首，政治力量點都大過1200人、要變都易啲啦，呢一票，我一定要囉！