嘩，香港失業率連升兩個月？咁大鑊？重災區仲係請得最多基層工人嘅零售業同餐飲服務業添？
 
分析話，同香港旅客少咗有關，連旅發局都證實，內地旅客增長大幅放緩，最新數據只增長左單位數字咋。內地客少咗，除咗內地大力打貪外，旅遊界亦相信，同之前嘅「驅蝗行動」好有關係，當然仲某程度上關某啲政黨同報章炒作兩地矛盾啦。
 
講真，香港咁細地方，容納到幾多旅客，真係值得研究；但之前有聲音話香港迫到爆，要求政府一刀切減自由行，旅遊業、零售業、餐飲業、學者即時出哂嚟反擊，話減兩成有過萬人失業架。估唔到而家未一刀切，少咗啲遊客啫，就多咗基層打工仔失業啦？
 
點都好，而家社會係咪時候冷靜啲諗諗下一步點行先？水貨客固然要繼續打擊，咁「一簽多行」收唔收緊呢？「收」嘅話點「收」呢？起唔起邊境商業城呢？全部都未有共識囉！
 
希望大家明白，近期即使仲有政黨同報章係咁話內地客落嚟香港逼爆泳池，但冇統計、冇數據、冇證據「三冇」，我哋係咪仲要信一啲無真憑實據嘅嘢先？內地客行為唔文明，我哋應該出聲批評，但每件事理應是其是、非其非，諗清楚自由行點客觀處理、又唔影響到打工仔都係文明人既表現嚟架。