「白色恐怖」、「政治打壓」，今次的主角又係泛民邊一個呀？咦，伍家廉？乜佢唔係D100既音樂節目主持人咩？政治關佢咩事呀？啊，冇嘢既，只係伍家廉尋日為「8.17和平普選大遊行」擔任司儀後，「D100」就即時送左碟豉椒炒魷畀伍家廉嘆之嘛。原因？咪就係政治理由囉。
 
「D100」既創辦人咪就係前民主派立法會議員鄭經翰囉，據報道話，伍家廉接個JOB做嗰時，鄭經翰話明唔干涉、採開放自由態度尊重伍家廉，點知尋日就突然話反佔中遊行「唔公義」，要炒左伍家廉喎。嘩，因為政治立場唔同而炒咗旗下員工，咁仲唔係「政治打壓」？點解個老闆仲講到好似大義凜然咁，話所有節目主持人必須認同D100行公義既立場既？乜喺呢件事上，「唔公義」既唔係D100咩？伍家廉呢個CASE，又係咪應該叫做「畀人滅聲」呢？
 
相信大家仲記得，早排有個網媒執笠，同埋前商台主持李慧玲畀人炒既時候，佢地都大聲疾呼「政治打壓」，雖然空口講白話咋，事後亦得到泛民金主報章、唔少議員同組織既支持，相比之下，今次D100講到明因政治理由炒左伍家廉後，呢批人好似完全無報道、完全無出聲咁嘅？
 
民主，最基本就係開放同包容，容納其他人既聲音，但一個連民主素養都冇既網台，又點樣自稱可以幫香港爭取民主呢？某啲議員、某啲組織同某啲報章，今次既行為，亦好似話緊畀香港人知，「公義」兩個字只係適用於泛民身上架咋；至於持其他立場既市民？SORRY囉，公道同公義，你哋自己去爭取把啦！