中聯辦主任張曉明嚟緊星期五開始，分四場見泛民議員傾政改。有人不滿中央咁遲先肯見泛民，話人大常委會就快有決定啦，見嚟有乜用啫。某份泛民金主既報紙，今日仲喺社論批評中央態度強硬拒絕「公民提名」，結論係搞到政改溝通障礙重重喎！吓？又捩橫折曲、「李呃人」上身，想將責任推得一乾二淨？
 
查實今年四月，喺特首梁振英費盡九牛二虎之力下，終於安排到全體泛民議員去上海同中央官員見面，點知泛民「做騷」多過溝通，有人話去又唔去、有人上到去，連面都未見就走返香港。
 
好喇，到五月，張曉明再次邀請泛民議員見面，點知泛民仍然扭扭擰擰，一時話地點唔啱、一時話見面形式唔合胃口，結果最後得兩個泛民同張曉明見面，大家評評理，到底係邊個唔想溝通先？
 
張曉明今次同泛民見面遲唔遲？遲架，不過責任唔喺中央呢一面。如果唔係有人傾都唔傾就搞「佔中」、如果唔係激進派死攬住違反《基本法》既公民提名講足成年，又點會造成今時今日既僵局？
 
大家開始擔心，政制原地踏步會令政局不穩，部份泛民好似突然發現溝通好重要咁，唔單止肯同張曉明見面，仲頻密邀請多個港區人大代表溝通，希望佢哋真係會放低成見，顧全大局支持政改啦。總之呢，事實要講清楚，中央同特區政府一直都想溝通架，普選一旦拉倒，泛民要負上最大的責任先至啱。