泛民尋日見記者，交代嚟緊同中聯辦主任張曉明既會面，工黨主席李卓人大大聲聲話唔接受「食住先」！奇怪，近排各界人士講政改，都係希望就算政改方案未係最完美，議員都可以「袋住先」，等落實普選後再逐步改善。阿人哥夾硬將「袋住先」變做「食住先」，唔通驚畀人笑佢之前「袋住」壹傳媒肥老闆捐畀工黨筆錢「先」？

明既明既，政改啦喎，梗係唔「袋住先」，錢可唔可以「袋住先」？大家心中有數啦！

講開「袋住先」，好多人誤以為，係最近先至爆出來既Term，查實如果大家仲記得，翻帶去到2010年政改果陣，當時民主黨既立法會議員劉慧卿推銷佢地既政改方案時，都叫人「袋咗先」架，話「袋咗先」都可以繼續爭取雙普選，所謂「一鳥在手，點都勝過百鳥在林」吖嘛！

雖然，今時今日，民主黨表明唔肯再次「袋住先」，但至少佢哋好積極同各界溝通，嚟緊仲分別約咗劉珮瓊同范徐麗泰兩位港區人大見面，希望佢哋幫手向中央反映意見，做法正面，總好過有啲泛民剩係將「溝通太遲」賴落張曉明身上吖。

有口痕友話，不如唔好講「袋住先」啦，索性講「袋咗先」啦，皆因「袋住先」隨時收得返，唔夠穩陣；但「袋咗先」就唔同喇，袋咗落袋就係事實，之後仲可以逐步完善，學中原集團創辦人施永青話齋，「要避免玉石俱焚，2017年既一人一票一於『袋咗先』」！

講到尾，2017年可以一人一票選特首，真係踏出歷史性既一大步，有票？梗係要啦！