早兩日有頭版報道，話特首梁振英上任後，樓價持續升咗兩成，批評特首推出既房策冇鬼用，仲話佢「做就有心無力」喎。

係，樓價升左係事實，弊在份報紙講啲唔講啲，冇講到過去5年私樓每年平均落成量只有9千幾個，但梁振英上任後，房屋供應未來5年就會大增四成，每年去到1萬3千幾個。搞到呢幾日，啲朋友個個話要快啲上車，以為樓價真係會係咁升，如果個報道可以加埋呢啲數據，大家會唔會理性啲、冷靜啲呢？

仲有呀，講開梁振英上場樓價升兩成，把鬼火，你又唔睇下，上屆特首曾蔭權任內，樓價足足大升咗超過七成架，唔講埋呢啲數據，又公唔公道先？

講開起樓，真係勁無奈，梁振英上場後一路積極搵地起樓，但有份報紙勁挫佢「盲搶地」、起插針式公屋，又炒作地區人士大力反對；好啦，到發展新界東北，份報紙又竟然大大隻字叫人去包圍立法會反對計劃，到而家又話樓價升，辣招唔掂，真係神又係你，鬼又係你喎！

正如份報紙既老總喺自己專欄都話，家陣樓價超貴兼非理性，貸款利率升左，建議想買樓既老友不如租多一、兩年等多等，唔知呢位老總係咪心中有數，知道落成量會升返，勸籲讀者們等下樓價係有機會跌返落嚟架；講道理咁諗，想樓價穩定，除咗要畀多少少耐性等房屋供應增加之外，市民亦要多啲發聲支持發展，雙管齊下先至得，唔通真係可以「又要馬兒好，又要馬兒不吃草」咩？