咦咦，呢幅相，咁熟口熟面既，咪就係地政總署助理處長林嘉芬喺買地風波後，喺自己塊地耕田嗰陣被無綫獨家影到既片囉。不過呢件事，最後搞到啲新聞行家好唔開心呀。點解？咪就因為李慧玲第二日在自己節目中狂插無綫「維穩」、「造假」囉，仲話無綫搵左個實習記者去做騷，淪為宣傳工具咁話呀。嘩，造假新聞喎，好大既侮辱來嫁，睇到個個無綫記者好火滾，於是相繼在面書申冤，反擊李慧玲無的放矢既指控。
 
無綫班記者力撐實習記者，當天呢位實習記者山長水遠入到元朗，不怕天時暑熱，好主動咁踩入農地，見到有個人喺度耕緊田，仲以為係個女工，即刻走埋去做訪問，點知原來就係主角林嘉芬，即時攞返個SOUNDBITE，專業精神十分可嘉；點知好好地一件事，最後居然被人喺完全無證據下，演譯、誣陷為「造假新聞」，你話係咪「佛都有火」呀？聽講呢位實習記者之後好內疚，以為自己做錯事，於是無綫啲前任、現任記者都出哂來撐，完全有前因有後果嫁。
 
生果總編輯沙膽虹見群情洶湧，今日喺自己專欄主動講「心有戚戚焉」，要代表份報章，向呢位實習同學仔同埋無綫Say 聲Sorry，仲批評李小姐評論「冇事實根據」，就「連蛛絲馬跡都冇」，肯定係「臆測」多於「評論」。
 
嗱嗱嗱，沙膽虹喺篇文度，兩度提問「有無具體證據」，又話如果真係悉心安排，都唔搵實習記者去啦，換句話講，一方面窒緊李小姐無遵守到傳媒應有講事實的操守，另一方面亦似乎無採訪常識。李小姐，連總編輯都咁樣話你，唔該你自我反省一下啦。