收咗壹傳媒肥老闆一百五十萬蚊唔申報，事後仲幫對方喺立法會上「維權」既工黨立法會議員李卓人，朝早上電台節目時仍然死不認錯，繼續話「法律上冇問題」呀、「冇個人利益」呀咁，一啲悔意都冇。

雖然筆錢已經過返畀工黨，但到底「代個黨收住錢先」呢個舉動啱唔啱呢？

其實道理唔係好複雜姐，大家試諗吓，如果要捐錢畀某個團體，你會直接捐去個團體度吖，定會寫張本票俾個團體既主席、入落個主席既個人戶口度吖？咪係囉，件事一啲都唔難明，如果立法會議員話「幫個黨袋住啲錢先」都冇問題既話，咁呢個世界咪亂哂籠；無論在私人機構、慈善團體定係公職人員，都知道「香港有ICAC」架嘛，如果有人俾錢我，話原來啲錢係俾我間公司既，我都即刻耍手擰頭唔肯要，廢事賴野啦。

再講，假設有人俾錢個公職人員，揭發時係咪又可以用「袋住先」做擋箭牌，再將啲錢求其捐哂去畀慈善團體，就可以當咩事都無呀？據曾經在廉署執行署擔任要職既人講，發生呢啲事，廉署已經夠晒理由立案調查，都咪話唔嚴重呀。

阿人另一個解釋仲離譜，話工黨接受由佢「袋咗啲錢先」，有晒會議紀錄，所以冇問題喎。哈，真係好笑，社會對政黨同立法會議員要求好高架，如果成個政治獻金程序根本就唔啱，咁即使個黨覺得OK，都唔代表件事係啱架喎！乜工黨對政治人物既要求唔係好高既咩？定抑或係因為人哥係自己友，就可以寬鬆啲呢？只能講句，完全偏離哂民意呀！