泛民議員接受壹傳媒老闆肥佬黎政治獻金單嘢愈揭愈混帳，泛民議員收錢唔申報已經夠晒大問題，點知肥佬黎旗下報章既社論竟然仲夠膽叫人唔好「窮追猛打」泛民，真係天怒人怨呀。

呢篇社論其中一個所謂論點，建制派政黨喺籌款晚會籌到既錢都同樣唔知有冇申報或者附帶條件，質疑冇理由繼續「追殺」泛民喎。

嗱，呢啲咪護短囉，人哋籌款晚會，第一係捐錢畀成個「黨」，唔係畀任何「特定」議員；第二人地係堂堂正正俾全世界都睇得到由邊個捐錢捐幾多，唔似得有啲議員秘密收錢；而家成個社會係質疑泛民議員用「個人身份」收錢「唔申報」，仲喺立法會裡面為壹傳媒「維權」兼投票呀，拜託唔好當人「lulu」、混淆視聽啦！

泛民平日站喺「偽道德高地」講嘢，如果好似社論咁講，泛民政黨係唔係要身先士卒，率先公布帳目先？查實根據泛民主派一向既標準，用個人身份收咗錢既好應該即刻辭職謝罪吖，唔係又玩「N重標準」咁肉酸呀？

作為市民，而家最希望係，立法會既「議員個人利益監察委員會」快d調查，訓誡又好、譴責又好、暫停職務都好，總之就係要查個水落石出，畀返個交代選民；至於唔認收咗錢的毛大姐同阿涂，大家都想知佢兩個喺立會選舉時係咪收咗錢無申報，你知啦，根據《選舉舞弊條例》無申報捐贈好大鑊要要坐監架，唔怪之得阿涂開頭玩潛水、毛大姐要走入廁所避記者，仲話同肥佬黎唔熟啦。