壹傳媒老闆肥佬黎捐錢畀泛民單嘢餘波未了，最新揭發公民黨黨魁梁家傑、工黨主席李卓人同埋社民連主席梁國雄收咗政治獻金後冇根據議事規則申報，最離譜係梁家傑同李卓人，兩個唔只收錢，竟然仲喺立法會內為壹傳媒「維權」，呢鋪水洗都唔清喇啩！

呢兩個「資深」議員做過乜？聽住喇，梁家傑舊年6月收黎智英30萬，今年1月22日，梁家傑喺立法會大會上提出，政府不滿壹傳媒，要求商界抽走《蘋果日報》的廣告，打擊新聞自由，嗰時講得好大聲，但原來呢樣野係呃人既，因為肥佬黎被人爆料的密檔中，有好多封信寫到明，早喺十年前，已經陸陸續續有大媽沙唔喺蘋果日報落廣告，咁即係話梁家傑年頭喺大會上講的，咩政治打壓呀，根本係幫壹傳媒砌人生豬肉啦。

至於李卓人，近兩年先後收咗黎智英150萬，冇申報之餘，仲喺今年三月喺立法會提到舊年有大批《蘋果日報》被縱火焚燒，威嚇新聞工作者，佢提到壹傳媒時，又係無申報嫁。

講到底，都係公民黨湯家驊公道，佢話，立法會議事規則有清晰要求，個人收到捐款，係要申報既，即使最後過數畀人，亦要交代。連民主黨劉慧卿都承認，「當議員有直接金錢利益，應該要申報，亦不應該投票。」
聽到未呀，收咗錢一定要申報架，而家連自己友都睇唔過眼，要講句公道話喇。學似肥佬黎咁大口氣講「係有做過」，咁D議員收左錢，唔緊要，咪講比市民聽囉，等大家心中有數，知道你地點解投支持或反對；總好過而家咁，無得解釋就變成NO COMMENT啦！