旺角暴動案審結，「港獨」組織本土民主前線的前發言人梁天琦暴動罪同襲警罪罪成。好多人唔係好明，點解香港班年輕人會去到咁激，竟然會提出完全不切實際嘅「港獨」主張呢？計囍雨話齋，今日香港之所以有梁天琦呢類行事思想同極之激進嘅人，多多少少都同香港教育工作者質素良莠不齊有關（個別老師咋，唔好對號入座呀！），例如浸大副教授陳家洛咁，公然喺大學裡面「挑戰」學生，藉以散播「五星紅旗升不起來」嘅思想；至於「違法佔領」發起人、港大法律學者戴耀廷更加唔使講啦，直頭寫文同埋喺公開場合鼓吹「港獨」。正所謂「甚麼人教出甚麼人」，有一班「港獨」教師，出咗一班「港獨」學生，其實又有咩咁出奇呢？

大學教師齊播「獨」

要數散播「港獨」嘅教師，首先一定要數浸大副教授兼公民黨前主席陳家洛。呢位學者曾經高調咁喺媒體訪問入面表示「我時時在班上挑戰我的學生，問他們有無想過有天早上醒來， 五星紅旗升不起……要想像它倒下來」，佢自己亦撰文講過「試想像某天一覺醒來，那象徵着中國共產政權的五星紅旗升不起來了，這個政權真的倒了」；一句到尾，就係叫學生以至大眾諗下，如果中國政府有一日倒台，大家要諗下點做囉？雖然佢冇講出口，但係咪想搞「港獨」同分離主義，大家心中有數啦！

另一個要提及嘅播「獨」教師，當然不得不提戴耀廷，身為法律學者，搞完歷時79日嘅「違法佔領」後，近年又開始喺度講「香港獨立」，仲要以學術討論做擋箭牌，叫人諗下如果「反專制」成功之後香港係咪要獨立。老實講，囍雨唔係戴耀廷肚裡面條蟲，唔知點解佢死都唔肯同「港獨」切割，但如果佢唔係煽動緊一樣嘢，又點會成日叫人諗推倒整個中央政府呢？換個角度諗，如果唔係想香港「獨立」，又點會咁想中央政府倒台，連整個中國陷入混亂、烽煙四起、民不聊生都在所不惜先？講到尾，咪就係一心想荼毒青年學生，將呢班年輕人推向暴力邊緣囉！

校園成播「獨」基地

除咗以上例子外，其他播「獨」或者「本土」嘅大學教職員或者前教職員仲有「港獨份子」陳雲同即將唔係大學教職員嘅立法會議員鄭松泰等等。見到呢啲所謂教師公然喺度播「獨」，作為納稅人有時真係要諗下，點解要用我哋啲血汗錢去養呢班想整個國家崩潰、生靈塗炭嘅人？分裂國家的主張，並唔係一句「言論自由」或者「學術自由」就可以免責同成為保護罩。試問一句，如果「校園播毒」呢種情況持續，大專院校仲會出幾多個「梁天琦」？大家真係想咁？

原圖：RTHK