一年一度嘅中學文憑試又放榜，睇吓今年有幾多個狀元先。

咦？(華英楊志聰)呢個狀元話公民提名有必要？
(協恩陳詠妍)呢位女狀元又話佔中值得？
(聖保祿黃曉晴)呢位志願做律師的狀元黃同學更加畀人大大隻字寫住：學校唔准佢答佔中問題？
 
搞咩呀？唔係講緊放榜架咩？黃同學一講完，立刻畀網民狂插，好彩有啲網民有良心，撐佢話「DSE放榜都要拉上政治，無病呀？」

另一個話：「其實放榜究竟關佔中咩事呢？人哋高分但唔喜歡政治唔答你問題又要比人鬧：呢個社會真是痴咗線」
 
(聖士提反書院譚梓恆)呢個狀元譚同學擔心佔中違法，所以唔會參加，同樣網民圍攻，有人支持佢「敢言、有獨立思考自己見解」，結果撐人又被人鬧。
 
黃同學件事原來未完架，傳媒追問校方係咪唔准同學講嘢，學校好肯定咁講無呢個規定，仲俾同學自由答問題，一齊出席記者會的另一個狀元徐同學可以做證架，仲即場澄清添，但佢番說話畀人CUT咗無播到呢。
 
好哋哋一個DSE放榜，居然搞成咁，班狀元啱啱中學畢業，好多都未成年，今日竟然要好似政界中人咁被追問政治立場。
 
查實前一排啲人批評行會成員羅范椒芬唔應該喺畢業禮上講政治話題，點解今日又要學生喺放榜時答政治問題呢？仲唔係雙重標準？
 
又話言論自由人人有，解講反對佔中就要被人狂插呢？