噚日七一遊行，警方曾經批評民陣既帶頭車輛刻意慢駛，但民陣副召集人王浩賢第二日就喺電台聲稱，話帶頭車前面塞滿遊行人士，根本加唔到速，仲反問係咪要架車「輾過人群」喎！咁事實係唔係呢？有啲嘢「真的假不了，假的真不了」，網上隨即就廣泛流傳一段影片，清楚顯示民陣部領頭車前根本無乜人，但架車就龜速行駛，真係人行都快過佢，仲時不時停喺度，咁唔怪得後面啲人逼到「沙甸魚」咁，同埋要等粒幾鐘甚至三個幾鐘，想知有幾龜速，睇下片啦！

嗱，正所謂有片有真相，部領頭車竟然駛得慢過啲遊行人士，頂住後面既人，難怪片段曝光後，唔少網民都質疑有人故意慢駛，營造遊行人士迫爆街道既效果！搞到啲市民咁辛苦又攰警察又畀人鬧爆，明明努力維持秩序，結果又畀人屈無意配合遊行！到底今次誰是誰非，香港人眉精眼企，你識分既！