搞咗成個星期，立法會終於公開上星期五衝擊立法會既閉路電視片段，畫面清楚見到，百幾二百個暴力示威者突然間一擁而上，齊齊將保護立法會大樓既鐵馬拉走，然後衝向玻璃，推推撞撞，連玻璃門都整裂咗。
 
另一邊廂，十幾個示威者夾手夾腳拎起個鐵馬，用力撞爛立法會緊急出口既外牆石板。仲有四、五十個示威者特登手拉手圍住拎住鐵馬既人，防止其他人去阻止添。
 
上星期警方清場後，班示威者一副可憐相，話自己只係和平示威同靜坐，用暴力既反而係警察。而家片段曝光，示威者既大話不攻自破啦！
 
如果咁樣示威都叫和平，咁阿媽用木棍打仔，係和平教仔；老師用粉擦掟學生，係和平教育；老公用拳頭打老婆，係和平慰妻。唔通真係「打者愛也」？唔好玩啦！
 
咁樣暴力衝擊，根本同暴民無異，如果示威者話咁樣叫「和平」，咁呢兩個字怕且都要有新定義喇。