沙田有一間中學話上課時間唔夠搞到老師要經常補課，所以學校決定減少小息時間，點知有學生不滿，話諗住喺兩星期後發起「佔領操場」運動，誓要表達民意，求公道喎。呢單「新聞」喺某個成日鼓吹「暴力抗爭」既傳媒報道後，BaBa聲成為網上熱話，有網民形容事件係學生既「公民覺醒」添。唉，你話今日做家長點會唔擔心？
 
嗱嗱嗱，一年幾前「佔中」三子提出「佔中」既時候，我都話啲學生遲早「佔領操場」、「佔領校長室」架啦，又畀我講中喇，但其實我唔想中囉。
 
今期流行佔領兇人，反對新界東北要佔領立法會、爭取違法公民提名就要佔領中環，而家學生唔滿意上堂時間，竟然話要佔領操場，事件既學校減少休息時間，都係唔想老師、學生補咁多課咁辛苦啫，大家撫心自問，合唔合理先？
 
講到底，責任最大既肯定係啲不良傳媒同網媒，個世界唔係對抗「權威」就一定啱架，見到「公民抗命」幾隻字就猛去LIKE，只講權利唔講責任，而家咪搞到是非觀念「亂晒龍」囉！