「佔領中環」喺嚟緊6月22日舉行既所謂全民投票日，話就話畀市民投票選擇心儀既普選方案，實情只將三個畀佢哋篩餘篩剩出嚟、全都有「違法」公民提名既方案畀市民「揀」，根本係想騎劫市民意願，幫「佔領中環」鋪路！不過市民咁醒，梗係睇得穿呢個局啦，於是「佔中」主事者就突然變招，諗住加個議題，等多啲人會投票咁話喎！

不過，個投票題目本身就好有問題，條問題係咁寫既：「如果政府方案不符國際標準讓市民有真正選擇，立法會應予否決」。議題睇落好似好合理，但乜嘢係國際標準呢？之前已經有專家講過，無論是泛民、中間派又或建制派方案亦都可以合乎國際標準架，可以話根本就無一致標準。仲有大家記唔記得「佔中」主事者喺商討日投票時，已經篩走咗好多「所謂」符合國際標準既方案，剩係留番幾個「公提」方案，睇起上嚟，唔畀市民有真正選擇似乎係「佔中」班人至啱！

剩係強調普選要符合國際標準，但刻意唔提普選要符合《基本法》規定，家陣又加多條題目，其實同呃LIKE冇乜分別！市民LIKE咗，到最後三個「公提」方案真係因為唔合法被OUT的話，「佔中」一定又會借題發揮，借投票結果去話有民意授權去「佔中」啦！之前市民已經畀佢哋「真篩選」普選方案呃咗一次，而家明知三個「公提」方案都不得民心，又出條咁既問題嚟去呃人，市民千祈唔好上當呀！