韓劇《來自星星的你》都做完一排，但係餘威未了，日前前政務司司長許仕仁涉貪案要選出陪審團，一直抽到第39位候選人先至集齊人，其中4位被抽中既候選陪審員話要去韓國旅遊，搞到法官都忍唔住笑講，「似乎我哋要將法庭搬去韓國」。識得苦中作樂，掂吖。

其中，有個女候選人仲話要同同事去韓國追《來自星星的你》既「都敏俊」，仲有一名做地產經紀既市民話自己英文差做唔到陪審員，雖然外籍法官批准呢次申請，但同時調咗佢入中文審訊陪審員候選名單，仲特登話未來有一宗要審六個月既中文審訊商業案件，認真「搞嘢」！

啲拒絕做陪審員既理由咁古怪，真係一百歲唔死都有新聞。不過咁，單案閒閒哋都審幾個月，打工仔驚畀人「炒」，搵理由去推都明既。但係另一方面，做陪審員又的確係公民責任之一，人人都唔做既話，後果可大可小。睇嚟未來政府同法律界都要加把勁向全港老闆同打工仔解釋多啲至得喇！