特首梁振英今朝出席立法會答問大會，點知一開會激進派議員黃毓民就大聲叫囂，唔夠一分鐘就畀主席曾鈺成趕出議事廳。其他激進派議員都爭住搶鏡，陳偉業向特首掟饅頭，梁國雄都想起手掟架，不過就畀保安員制止咗，至於陳志全表面斯文、內裡粗人，不停喺度叫囂，結果梗係全部畀人趕出去啦！點知畀人趕都唔知醜，梁國雄死都唔肯離場，仲怪立法會主席曾鈺成針對佢，仲衰過「小學雞」，做咗唔認、仲要死撐。曾主席冇晒計，最後好無奈咁被迫腰斬答問會囉。

梁振英喺答問會其實講得好啱，大家民主講咗好多，都要講吓文明，立法會搞成咁，真係失禮死人。

講到「佔中」，特首指出係「佔中」自己講明會違法，仲要癱瘓中環，警方咁又點會發「不反對通知書」呢？佢仲透露有商界人士憂心「佔中」既影響，研究民事索償參與「佔中」既人添！點知呢啲道理，事後竟然畀泛民刻意扭曲抹黑，話特首唔尊重法治呀、恐嚇呀咁；喂，你講咗要犯法，我話畀你聽犯法會畀人拉，咁都叫威嚇？呢個係咩世界呀？

呢啲咪歪理囉！議員搗亂議會，無做好份工，仲話人威嚇你，呢啲咪破壞行政立法關係之嘛！激進民主派議員搞事，溫和派例牌就做幫凶，今次仲幫手話特首打壓「佔中」，「佔中」肯定違法，而且一定係暴力，唔通特首又要鼓勵喇喎？點講都唔通啦，鼓勵人犯法，傻的嗎？呢班溫和派所做既，根本就係縱容暴力，事事斷章取義，希望佢哋盡早回頭是岸，盡快同激進派分手，做返個真正稱職既議員啦！