激進派議員Keep住拉布，搞到立法會議案大塞車，好多惠民既措施都受阻。搞咗個幾月，立法會主席曾鈺成終於「剪布」，為辯論設定時限。班激進拉布議員固然令人討厭，但係見住人拉布但企埋一邊唔出聲既「溫和」民主派，亦好似唔記得自己係議員咁，企埋一、二邊當睇花生騷，同樣唔好得幾多。
 
呢班所謂溫和派，拉布之初一直閃閃縮縮，一味話「唔支持拉，亦唔支持剪」。當曾鈺成決定順應民意剪布後，突然又撲晒出嚟問做乜要剪。呢個現象認真奇怪，皆因拉布期間呢班人全面隱形，唔知仲以為佢哋放晒假，而家又走晒出嚟抽水佔道德高地，你話呢啲係乜議事態度喇？唔參加拉布，因為怕得失選民、唔阻止拉布，又係怕得失選民，呢個世界邊有咁著數呀？想兩邊著數拎晒？你當選民係傻架咩？真係冇乜政治道德囉。
 
政府官員一早講過啦，拉布令好多同民生、基層有關既項目好似低收入在職家庭津貼呀、綜援同長生津雙糧等等統統受阻，既然做得溫和民主派，理應支持剪布吖，所以話，溫和派近年失勢唔係冇理由既。計我話，如果佢哋可以勇敢行出嚟支持立法會設立剪布機制，話唔定仲可以得到中間理性選民支持。各位，溫和民主派，諗得過架。