教育局局長吳克儉日前苦心婆心咁提醒教師、學生唔好參與違法「佔中」，否則要承擔法律責任，如果留有案底，隨時會影響工作同前途。點知教協 (香港教育專業人員協會) 就反應其大，即日發表聲明，上綱上線鬧局長「無中生有」、「憑空警告」，仲話局長干預教育專業添。嘩，使唔使咁激呀？不過如果細心諗諗，叫人唔好犯法到底有乜問題？「佔中」確實係醞釀緊，個別傳媒仲「日煲夜煲」，咁點算係「無中生有」？仲有激進既學生組織同社運人士聲言一旦不能實現違法既「公民提名」就一定「佔中」，唔通政府要等罪案發生先有權講嘢？到時就畀人話「為時已晚」啦！
 
仲有，教協話吳克儉將「佔中」化成非法行為，漠視運動既「和平合法商討」方式。教協既邏輯真係得意，商討既時候當然和平啦，但商討既內容係策劃一個違法行動嘛，咁樣講即係啲賊聚埋一齊和平咁傾點樣打劫，咁就唔犯法喇喎？作為全港最大教師組織，究竟係唔係示範緊「語言偽術」呢？局長提醒教師、學生如果參與「佔中」而要承擔法律責任，教協就話係「白色恐怖」，好，咁唔該教協答市民，「佔中係唔係違法？」如果係違法，點解係「白色恐怖」先？
 
吳克儉作為教育局局長，向教師和學生作出善意提醒你就話人「打壓」，家陣都唔知邊個打壓邊個！再講，教師因個人政治理念參與「佔中」，呢個係個人選擇，但如果佢哋用學生對自己既信任，引導同埋帶領學生參與違法既「佔中」，咁就極之唔妥喇。總而言之，「佔中」就係違法，唔該教協唔好避而不談，更加唔好轉移視線！