近日高鐵工程延誤風波鬧哄哄，錯咗梗係要認，運房局局長張炳良、港鐵管理層已經向咗公眾道歉，不過例牌梗有人叫佢哋下台。張炳良係就係論盡咗啲，不過泛民既會計界議員梁繼昌竟然為佢抱不平。

佢話，其實張炳良喺房屋政策做得唔錯，只係運輸方面做得無咁好，其實運輸同房屋兩大範疇應該分開處理，佢會喺立法會提出要求政府架構重組既議案，而且絕對唔怕畀人話佢為政府護航咁話。

世事真係好玄妙，大家唔知記唔記得，早喺特首梁振英上任前，已經打算將政府架構重組，成為五司十四局，「運輸及房屋局」與「發展局」會重組為「運輸及工務局」及「房屋規劃及地政局」。可惜吖，明知係好事，但激進派立法會議員事事政治為先，監生「拉布」拉死咗五司十四局，房屋係今屆政府施政既重中之重，照計由熟悉房策既張炳良做係好OK架，點知仲要揹埋份運輸，你估佢係超人咩！再講，近日政府決定重推「創新及科技局」，其實都係當日拉布拉到冇咗之嘛，就算今次成功上馬，對科技界嚟講，已經拖累佢哋遲咗幾代發展啦！

又要馬兒好，又要馬兒不吃草，邊有咁著數，要人解決香港各種深層次矛盾，但又拉布拉死晒啲政策局，而家咪出事囉！所以話，要反，一定反「拉布」啫！