「佔領中環」喺5月6號舉行咗第三次商討日，喺十五個方案中「篩選」出三個唔合《基本法》、有「公民提名」成份既方案去畀市民「公投」，如果最後政府方案唔合佢哋心意，就隨時可以「佔中」喎！咁明目張膽搞「篩選」，話佢係「佔中篩選日」就差唔多！

「佔中」整個「篩選」過程同民主完全扯唔上關係，最初先用「國際專家」做擋箭牌，篩走唔少合乎《基本法》既方案，再畀2500個「佔中」自己友（即係簽晒意向書參加違法行動嗰班）投票篩出呢三個方案，最後先至畀市民投票咋。

嗱，如果「佔中」係都要話自己夠民主，咁唔該答咗以下幾個問題先：首先，由2500個已經有既定立場既人投票，全部支持違法既「公民提名」成份，咁點樣可以選出一個持平既方案？

第二，2500個人頂多代表咗激進派既意見，邊度嚟廣泛代表性呢？點樣可以代表住社會各階段、不同政見人士，甚至300幾萬選民既意見？

第三，點解要先「篩選」再畀選民去揀？成日話要「真普選」、「無篩選」，但「佔中」班人就先自己篩走其他方案，再搵自己友揀最啱自己心水既方案，無論市民投邊個方案，都一定合乎自己心意，咁即係「佔中」玩晒！

聲稱爭取民主既人，試圖用最唔民主既方法製造民意，美其名畀市民選擇，實際就係「獨裁」之嘛！睇到戴耀廷既獨裁行為，令人諗起《動物農莊》既故事，奸豬「拿破崙」奪得權力之前就聲稱為其他動物爭取民主，到自己成為領袖既時候就變成剝削其他動物既權力。點都好，「佔中」已經全面向激進勢力傾斜，所謂「愛與和平」肯定只係包裝，仲話搞「真普選」喎，搞「真篩選」就真啦！