立法會第一日討論預算案修正案，結果開會開咗四個幾鐘就因為人數不足而流會。拉布既議員玩到上晒腦咁，一行出嚟就話今日係佢哋主場喎，仲聲稱強烈譴責建制派「保皇不力」，因為通過財政預算案，係支持預算案議員既責任，佢哋唔支持，所以唔關佢哋事喎。咁都講得出，真係歪理無極限！立法會流會明明係壞事，點解梁國雄、陳偉業、陳志全行出嚟可以笑笑口，好似好開心咁架？
 
你哋就高興得過喇，今次流一流會，意味住五月中之前通過財政預算案既機會又細咗，你哋幾個人歡喜，幾百萬人就唔開心，嗰啲等緊綜援、長者生活津貼、長者醫療券加碼，仲有最新既「低收入在職家庭津貼」既市民，分分鐘又要拖幾個月先收到錢，生活隨時出問題，真係陰公！
 
又要「拉布」，又要為「流會」既責任卸膊，呢啲咪又要威又要戴頭盔囉！先唔好講建制派嗰邊點睇都坐咗較多人，如果唔係你「拉布」，提出埋啲無聊瑣碎修訂，兼喺會上講無聊嘢，人哋點會行開飲杯嘢先？再講，泛民嗰邊得嗰幾個人喺度，要求點人數既「拉布」議員長毛自己又離開會議廳喎，咩人要為立法會流會負上責任？「不言而喻」啦！