一直以嚟，唔少政團都要求特首普選要有「公民提名」元素，話咁先合乎國際標準喎，又話「公民提名」一樣可以符合《基本法》。哈，點知呢次真係「真的假不了、假的真不了」，大律師公會近日就提交咗特首普選意見書，講到明「公民提名」唔合乎《基本法》，仲講到明如果搞到提名委員會變成橡皮圖章，咁就一定唔合法。一句到尾，即係「公民提名」違法囉！
 
嗰啲鼓吹「公民提名」既團體，成日話法治係香港既核心價值，而家連大律師公會都話佢哋既方案係唔合法，仲以為佢哋會尊重法治，乖乖哋回歸法律框架討論，放低「公民提名」，點知佢哋話「覺得」自己既方案會過到喎！吓？百份百感覺？乜傾政改靠FEEL架，咁係唔係民粹呢？
 
最離奇既係，佢哋話如果「公民提名」唔合法，咁就要修改《基本法》去配合，令「公民提名」可以符合《基本法》喎。嘩，咁咪即係「輸打贏要」囉？仲有呀，如果話「公民提名」合乎《基本法》規定，又洗乜修改《基本法》呢？話要修改《基本法》，即係知自己既方案違法囉！自打嘴巴都算，修改《基本法》可能要幾年時間，修改完可能都唔止2017年啦，仲點2017年普選行政長官呀？
 
違法話合法，畀人篤穿咗又反過嚟要人修改法律去配合，邊有呢個道理架？如果打住民主、自由、法治既人都唔守法，咁政改仲點回到正軌，實現普選呢？香港人，都係理性啲，返到《基本法》同人大常委會既決定上面去討論，只要齊心一致向呢個方向進發，一人一票選特首一定可以達成既！