最近一對內地夫婦既兩歲小朋友喺旺角行人專用區既街上面便溺，有港人隨即舉機影個小朋友相，引發軒然大波。內地「天涯論壇」既網民話要以後唔嚟香港，香港網民話好行夾唔送，內地網民隨即反制，話帶小朋友嚟香港便溺，跟住呢？香港網民又發起集體舉機影內地客行動。唉，相嗌唔好口，總之就沒完沒了，愈鬧愈難聽！

查實大家有冇咁諗過，事件未必係咁非黑即白既，有未經刪剪既片段流出，原來當日個小朋友喺街便溺既時候，佢阿媽係有用嘢墊住，睇落似乎真係小朋友完全忍唔到，而唔係貪方便有心破壞，搞到家陣咁大件事，上晒報紙、又搞到問責官員呀、國家領導等等都要回應，美國華爾街日報又報道喎，真係想問句：使唔使呀？

再講，用相機影低個小朋友，其實真係唔係咁好，始終小朋友「人有三急」，真係未必可以好似大人咁忍得，有仔女既相信都會明白，況且人哋都盡量唔想整污糟啲地方，最後仲搞到拉拉扯扯，有咩好睇先？

嗱，我唔係話盲撐內地旅客呀，始終當街小便一定唔啱，係毋庸置疑既，但如果事發地點唔係好似食店咁一類會令人嚴重不安既地方，咁作為文明有禮既香港人，出聲嚴正提醒已經足夠，香港人一向自認有禮，帶埋個遊客去廁所都冇問題吖。

因為小朋友小便，而搞到件事「被升級」為兩地人民罵戰，外國人見到都覺好笑啦，兩邊一樣咁難睇架咋，仲分分鐘成為國際笑話，為咩呢？唔通真係為啖氣？「冰封三尺非一日之寒」，兩地矛盾要兩地政府同各界一齊努力，有商有量咁循旅遊配套同「自由行」安排等方面著手先有望解決。點都好啦，一人退一步、世界自然好，香港人，放鬆啲啦！