喺啱啱過去既復活節假期，單單係其中一日就有31萬人次經各個陸路口岸出境到內地，就算只係閒日，每日都有大約16萬人次離港上深圳。而由陸路入香港既內地客呢，每日有10萬左右。呢啲數字代表乜呀？咪代表內地、深圳一早已成為香港人生活圈既一部分，而且仲係密不可分！

近年來港旅客人數增加，景點、購物區等逼爆，香港市民難免有啲埋怨聲音。有議員話要向內地旅客徵收入境稅，話可以控制旅客數目喎！香港如果要開徵入境稅，人哋就唔可以向港人徵稅咩？提出建議既議員，係咪想玩香港人先，提出政策要深思熟慮，唔好「隨口噏、當秘笈」先得架！

老老實實，對於一心嚟旅遊購物既內地旅客嚟講，一百幾十蚊既入境稅可以減低佢哋來港意慾咩？唔該大家真係分清楚，到底好影響香港既係旅客定水貨客先啦！嗱，對於經常北上既香港基層嚟講，每次一百幾十就唔係小數目喇。仲有，家陣係你上去人多、內地落嚟人少，收起錢上嚟，香港好冇著數啫！

凡事兩面睇，兩地關係有來有往，切忌「互相唔妥」。與其諗埋啲無聊計仔唔畀人入嚟，不如思考吓點做到WIN WIN雙贏好過啦！邊境商業城做唔做得呀？開發大嶼山增加商業設施又得唔得呀？推廣更多香港旅遊景點，等啲客唔好成日集中喺市區又O唔OK呢？香港人咁有腦，一定可以搵到解決辦法既，唔使吓吓針對旅客吖，搞埋啲辱罵旅客既示威，其實係影衰晒香港人先真！