立法會議員出訪上海之旅順利完成，建制、泛民議員都可以同中央官員直接溝通，總算係一個好開始。不過，部份泛民議員喺上海玩折返、玩離隊，仲周街派公民提名傳單添，可以話係玩嘢無極限。人哋基本法委員會主任李飛講到明「公民提名」唔合法，佢哋仲係話唔畀就「佔領中環」喎，咁想落實普選都幾難！情況就好似入去中菜館要食法國餐咁，幾有誠意都煮唔到畀你食啦，唔通真係拍戲變魔術咁簡單咩？整隻蔥油雞畀你，你硬係要食法國血鴨，仲慘過雞同鴨講，都唔知點「埋欄」，在情在理在法都唔啱數啦！

計我話，港大法律學者陳弘毅就講得啱喇，堅持流於理論既公民提名，可能純粹係「叫價」！咩係「叫價」呀？咪就係明知不切實際都堅持己見囉，明知違法，係都要逼港府同中央答應，你唔答應？「佔中」囉！拉倒囉！講就容易，但大家唔好唔記得，香港既民主要一步一步走出嚟，一人一票選特首係好多人既願望。

泛民議員當政改係一場戲，都冇理由逼全港700萬人做你觀眾架嘛，仲要愚弄部份人去「佔中」，搵香港市民做籌碼，會唔會過份咗呀？大家睇睇最近民調有65.6%受訪者「反佔中」、又有52.7%希望2017落實普選，就知民意係點啦，議員叫價高，有無考慮真係拉倒普選對唔對得住市民？又負唔負得起呢個歷史責任呢？奉勸泛民議員，做SHOW要有譜，見好就要收，最後搞衰咗普選，真係會成為千古罪人架！