九龍城疑似拐B案終於水落石出，原來真係一場自編自導自演既悲劇，主犯真係BB女個媽咪。囍雨唔係要抽水，只係想再次呼籲，真係、真係唔好再妄下判斷、唔好隨便將責任歸咎任何人，更加唔好自組網上法庭，任意玩「公審」。

記得事發之初，BB女個媽咪一句：「大陸口音既人問路後BB唔見咗」，某班人就即時群起攻擊大陸人同新移民，一時話個人遊同新移民令香港罪案率上升，一時又話只有大陸人先會咁狠心拐人個BB等。種種刻薄都冇理據既批評盡出，總之就「鬧之而後快」。

之後警方鎖定BB女個媽咪係疑犯，班人又話：「媽媽一定係新移民啦，香港人點會咁狠心呀？」老實講，疑犯係唔係新移民，而家都未證實，大家既評論有乜根據先？話佢哋畀「仇恨」蒙住雙眼或者會誇張，但話發表呢啲言論既人「偏頗」就一定走唔甩！

互聯網愈來愈普及，但愈普及，網上欺凌就愈多。個個走去做法官，仲要係未審先判嗰隻，搞成咁，唔會又關個人遊同新移民事啩？囍雨唔係要偏袒大陸人，因為大陸的確有唔好既人，不過大家撫心自問，唔通香港就冇唔文明、唔禮貌、唔守規矩，甚至十惡不赦既人咩？

批評同判斷，一定要根據事實同證據，最衰係呢啲硬道理，今時今日好多人已經拋埋一邊，囍雨真係覺得好可悲。講到呢度，一定要讚一讚香港警察，烈日當空走入堆填區搵BB女條屍，呢份毅力同熱誠，絕對值得大家支持。

希望香港警察繼續加油，千祈唔好因為現時社會麻麻既氣氛而洩氣。