剩係睇條題目，已經覺得係今日香港一個好大既「迷思」。警方尋日高調拘捕幾個手機CALL車程序UBER既職員同司機，話佢哋涉嫌經營白牌車生意（實際罪名唔該自己去查）。事後，坊間竟然一面倒鬧政府同警方喎，話唔應該取締服務優質既UBER喎。你話吖，今日既香港係唔係病咗吖，依法執法都畀人鬧，真係唔知係乜世界。

老老實實，如果大家要批評的士服務差過以前，囍雨都唔會反對，但咁係唔係代表大家要去支持違法白牌車生意呢？做人係唔係一定要咁極端，對某啲嘢唔滿意就去支持違法先？大家應該要停一停、諗一諗，營業車輛發牌制度目的係乜？其中一樣，肯定係可以確保安全同有所規管啦！白牌車好多保險上既問題，乘客冇保障已經講咗好多；喂，的士要定期驗車架，白牌車使唔使呀？

算，呢啲道理都唔想再講，囍雨只想問，點解今日香港有班人，好似以「打破制度」為榮咁既？現有制度未必一定唔好架喎，至少搵食車既發牌制度，囍雨就覺得好好喇，有保障吖嘛。好似囍雨一家大細，一個TOUCH WOOD有咩意外，至少有得追究、有得追保險吖！白牌車？好服務？冇保障就勢係假！

關於UBER另一件好笑事係，投資推廣署喺警察拘捕UBER職員後移除咗原本喺網頁上介紹UBER既資料，事後班九唔搭八又拎嚟笑。囍雨真係想問：「你們傻的嗎？」

投資推廣署協助將UBER引入香港，唔代表容許「犯法」架！UBER喺香港，本身就有合法渠道經營，可以係的士啦，亦可以係有營業執照既私家車，而家香港唔係冇營運空間畀UBER架，咁UBER嚟到香港之後犯法，注意：係犯法喎，唔通仲推介佢咩？冇病呀？

所以話呢，某班人真係反政府反到上晒腦，遇到乜事都唔可以客觀清晰去睇。政府可唔可以改善發牌制度呀？可唔可以增發的士牌呀？可唔可以規範化UBER呀？唔係唔可以，不過唔係犯法先、偷晒步先囉！仲有，發牌畀搵食車其中一個目的，就係要控制車輛數目，乜呢個問題解決咗咩？乜而家香港交通唔再繁忙咩？

為咗自己喜好同私利，視香港法例同制度同無物，容許我講句，咁係叫做「偏激」，唔係「勇武」囉！OK？

原圖：topick.hket.com