財爺曾俊華就嚟發表新一份《財政預算案》，佢喺網誌預告未來會逐步取消「派糖」，仲話以而家既情況睇嚟，呢一日應該好快會出現。網誌一出，社會上例牌意見紛陳，一啲理性既學者表示根本唔應該無止境派糖，要減少啲一次性紓困措施，亦有人批評財爺妄顧中產之苦，指出中產交稅多、「零」福利等！中產交稅多、「零」福利，聽落去好啱聽，但諗一諗，中產真係無福利咩？

大家唔好誤會，廣男咁樣問，唔係話政府唔應該幫中產，因為廣男都算係一個「掹車邊」中產，親身體會中產生活苦困，剩係房屋開支已經佔咗人工一大部分。如果政府有扶貧措施，點都應該幫下中產，多多少少退下稅都好，分配社會資源呢家嘢，「不患寡而患不均」嘛！

不過咁，廣男絕對唔同意中產無福利呢個論點。廣男所認知既福利，唔係兜口兜面畀錢你先叫福利，讀幼稚園有學券係福利、十二年免費教育係福利、公共醫療服務係福利，買間居屋住其實都係福利。所以話，中產唔係無福利，甚至香港既福利比起唔少地方都要好，只不過好多人對呢類福利冇切身感受啫。如果話其他國家、地方有呢啲、有果啲福利，公道啲講，講埋呢啲嘢，香港稅率真係唔高架，你交幾多稅，其他國家既人又交幾多稅先？

廣男覺得應該撫心自問，扶貧、減「甜」，將焦點放喺投資未來，呢個方向正唔正確？政府喺呢方面既執行力度的確做得未夠，好多範疇有待加強。但諗深一層，如果政府個唔企硬，轉頭又會跌入年年派錢，但唔夠資源做好長遠規劃既死局，相信亦唔係有識之士想見到既結果。

香港好多中產，包括廣男同父母，一向都係靠自己，無咩望政府幫手。只要政府真係可以塑造好營商同居住環境，做好下一代既教育工作已經足夠。畢竟而家既生活環境有啲惡劣，住屋、生活成本都好高，如果《施政報告》幫咗基層，《財政預算案》呢Round都應該輪到中產，但就唔係「派糖」，係投資未來囉！

原圖：hktdc