新年流流，本應係和和氣氣、歡天喜地既大節日，以為呢排實無咩大新聞好講啦，點知民主黨宣布要喺中環舉行「佔領中環」誓師大會，廣男本身已經對單新聞非常關注，平時Sell開「和平理性非暴力」既民主大哥竟然咁快行出嚟話要犯法喎，點都要留意下啦！

殊不知原來全場戲肉，係佔中後援會「踩場」，令到卿姐、仁哥佢哋要警方保護離開。唉……誓師已經搞成咁，如果真係要佔中，泛民班人可能未佔到中，就已經畀自己友「片」到遍體鱗傷。

「和平佔中」運動既全名係「讓愛與和平佔領中環」，行動所指既「愛」、「和平」真係可能呃到人，哦，原來佔領都可以和平既，只要大家意志堅定，堅守和平原則，絕對唔會出事！經過尋日民主黨宣誓「佔中」被狙擊一事，更加肯定「佔領中環」係無可能會「和平」。

不過，「佔中」仲未成事，泛民內部不同勢力已經開晒波喇，戴耀廷、朱耀明講到「愛與和平」力量咁大，尋日佔中後援會同民主黨起爭執果時，佢哋喺邊？佢哋咪喺現場，得個企字囉，信佢哋一成，真係「雙目失明」！和平喎，愛喎，Are you kidding me？

泛民而家連內部都安撫唔好，佢哋如果搞違法佔領運動，莫講話係和平，連和氣都未做到！民主黨講到自己咁和平，但根據廣男既觀察，其實民主黨自己都「著晒火，上晒頭」，主席劉慧卿果句「若果想咁樣威嚇民主黨，佢唔識我哋呀！我哋係邊個呀？我哋係民主黨！我係劉慧卿」，廣男聽到真係笑咗出嚟，民主派大黨既主席，竟然咁失儀，講到自己好威咁；如果真係咁威威，佢就唔使警方保護佢上的士啦！

雖然民主黨宣誓話如果無「真普選」就一定會義無反顧參與「和平佔中」行動，甚至成日話預咗要坐監，但廣男想講佢哋係無可能會被捕、坐監架！

原因好簡單，將來「佔中」行動如果真係開始到，激進民主派部分人士就會不斷向民主黨叫囂同掟嘢，本來要驅散示威者既警方，見到咁既環境都要保護民主黨班大哥大姐搭的士走人啦，警方未拉人，民主黨班人都走晒，又點玩所謂既「公民抗命」，留守到最後一刻呢？民主黨最多咪事後同記者講：「今日係香港民主運動最黑暗既一日，因為民主黨無得參與民主運動」。

原圖：etnet