民主黨資深黨員狄志遠近日喺政改一事上企得好前，支持有條件袋住先既佢，睇法同黨內部份死硬反政改人士有好大分野。本來就算意見唔同，民主黨打住民主旗號，理應都會好包容、用最開放態度對待先係，哈，偏偏民主黨又似乎唔係想像中咁開放喎，今日就有報道話，民主黨唔中有人好唔滿意狄志遠接受《港人講地》訪問，話再有下次既話，就會向黨既紀律委員會投訴喎！嘩……咁惡既？講野都唔畀？

嗱嗱嗱，先旨聲明呀，篇報道唔係囍雨老作架，今日《星島》篇報道係咁寫既：「不過狄志遠近日的言論，在黨內惹爭議，他最近接受梁粉基地『港人講地』訪問，更令部分黨友十分不滿，揚言再有下次，隨時會絕地反擊。」

報道仲話呀，狄志遠多次發表同民主黨唔同既意見，唔少民主黨中人都有「好大意見」，仲表明如狄志遠再有下次，即使明知沒有結果，一樣會向黨內的紀律委員會投訴咁話。

由於篇報道冇點到名，相信各方都無從查證既真偽架喇，不過如果內容完全準確既話，民主黨就真係有辱「民主」之名喇。嘩，發表同個黨唔一致既意見就要畀你批評同投訴？投咩訴呀？民主黨喎，唔畀講野架？咁一言堂，學咩人講民主呀你班人？

仲有，囍雨真心想問一句，接受《港人講地》訪問點解會激嬲黨員呢？咩事呢？而家係咪即係話，民主黨黨員只可以接受金主肥佬黎份《蘋果》訪問先？乜從政唔係應該面對全港市民架咩？即係立場同你唔一樣既媒體，你就唔接受訪問呀？

咁選擇性接受訪問，請問你點面對全港市民呀？全港市民都好多唔同諗法同立場架喎？民主黨唔係咁狹隘剩係面對自己支持者呀？咁小家，點從政呀？你班民主黨員同民主派支持者唔好又東拉西扯落建制派度呀，你哋打住民主旗號、有光環、好威威架嘛！

一件小小既事就已經睇到，香港唔少口口聲聲支持民主既人，其實先係最獨裁同自私既一班，香港靠你班人爭取民主，等香港可以向前走？算把啦！

原圖：takungpao