廣男心目中既頭號性感女神官恩娜（ELLA）早前有篇文章講文化差異、中港矛盾，叫人包容、接受同幫助內地人，喺「凡內地的都要反」、「凡大陸的都要罵」既世情下，有咩辦法唔畀人批評呢？有網友仲話官恩娜唔應該講包容，應該批評中國內地先啱！講到義正詞嚴咁款，好似好有道理，但諗一諗，乜我地既社會已經變成批評、排斥先係正確，講包容、幫忙就係大錯特錯？！

我睇過ELLA篇文，文章引番自己當年喺英國讀書唔識當地文化被取笑既例子，引申到香港和內地人一樣係中國人，點解唔可以包容內地人呢？官恩娜雖然表示要包容內地人，但佢自己都講到明佢所講既係生活禮儀，絕對唔係叫內地人來港隨地大小便、搶學位、搶奶粉、搶床位等等，既然官恩娜都澄清咗自己文章既觀點，窮追猛打佢根本就係玩追殺、玩欺凌同製造白色恐怖！

查實家陣唔少香港人都鍾意玩歧視，得唔得，我話得，畢竟香港係自由社會，你唔犯法，我都吹你唔脹。問題係當有人叫大家多少少包容既時候，唔該唔好即時批評、詛咒、謾罵同奚落囉，人哋冇錯架，人哋想個社會多啲愛都係冇錯架！叫人多啲體諒就係「出賣香港」，大家係唔係將「出賣」兩個字睇得太簡單呀？定係玩開網上欺凌嗰班人自信不足，成日擔心自己畀人出賣，所以開口埋口就鬧人「賣港」呀？

算啦，對於呢件事，我實在冇乜真知灼見，明明ELLA女神既講法有理有節，但就畀人鬧係牛鬼蛇神，價值判斷混亂，是非黑白全部被顛倒，呢個就係今日香港囉。

廣男本來諗住投稿講下過年無雞食單野，但見到ELLA畀人網絡欺凌，真係忍唔住要寫番篇文講吓公道話。ELLA又係唔啱既，如果覺得自己講既嘢有道理，使乜怕咗嗰班人先？對於上綱上線、無限放大ELLA篇文章既人，廣男必須講一句：咁仲成世界既？

原圖：singtao