最近，某電視台委託港大進行民調，發現「若中央承諾日後優化選舉辦法」，有六成六人會支持方案。驟眼睇落去，好似幾正面咁喎，六成六人支持方案喎，WELL……可能囍雨多心啦，我始終覺得，呢個結果未必值得高興。

嗱嗱嗱，先旨聲明，港大民研調查方法冇咩問題架，囍雨只係想帶出，民調除咗字面義外，仲有另一層深意。首先，民調話：「若中央承諾日後優化選舉辦法」本身已經十分難實現，唔係話普選特首既選舉辦法唔會有改變，事實上連全國政協副主席董建華都已經用佢國家領導人既身份講咗，普選方式將來係有機會變既。

問題係，呢條問題既前設係「中央承諾」，講真，要中央呢個時候作出承諾根本就係不切實際。唔係話中央一定唔放寬；相反，如果香港成功通過政改，意味住香港社會願意回歸基本法正軌，到時自然萬事有商量，乜都有可能。只不過前提係，香港肯回歸正軌先得。

況且，即使通過政改，下一次重啟五步曲，講緊最快都可能要到2020年，時間咁長，真係乜都有可能發生，好似近年喺部份香港年輕人之間湧現既「港獨思潮」正係一例。

試諗吓，如果，只係如果，通過政改後，2020前後香港突然出現一隊武裝革命部隊，咁大家覺得中央有咩可能放寬個選舉辦法吖？又或者去年嗰個違法佔領，未來無日無之咁重複發生，咁個特首選舉辦法又有冇可能再改動吖？

所以話，任何國家政權，都冇可能將啲嘢講到咁死，講死咗，令到自己冇迴旋空間，邊個會咁傻呀？

好，講咁耐，到底個民調問題有咩問題？技術上同學術上係「冇」既，但想深一層，由於前設係基本上冇可能發生既「預先承諾」，結果就係，班泛民可以用呢個民調結果，將否決政改既責任推落中央同特區政府度囉。

如果呢個民調結果堅係炒得熱，咁你估梁家傑之流講乜吖？「中央政府，與民為敵，連承諾都唔肯做，政改通過唔到責任一定係喺中央啦！」唔信，放長雙眼吖。

原圖：NOW新聞截圖