曾經喺2010年發起所謂「五區公投」嘅社民連長毛梁國雄，早幾日喺無綫新聞個節目上面話，如果要了解社會對政改嘅民意，最好就係喺方案公布後發動所謂「辭職公投」喎。

先有民主黨嘅AV仁，之後就到長毛，泛民主派對「辭職公投」念念不忘，到底乜嘢葫蘆賣乜嘢藥先？係人都知，呢類辭職補選根本就唔可能帶來任何影響，夾硬要做，除咗做SHOW之外，實在諗唔到仲有咩用處。

范國威都有相同睇法？

可能大家會話：「泛民做SHOW，唔出奇吖，泛民有邊日唔做SHOW先？」啱，不過除咗咁之外，呢班人除咗做SHOW外，反覆將「辭職補選」擺喺口邊，一定有其他原因。就連最叻提挑動兩地矛盾嘅新民主同盟范國威亦話，民主黨咁做，一切都係為年底嘅區議會選舉啦！

嗱嗱嗱，囍雨唔係信口開河，斷估無辛苦架，不妨計計條數先討論吖。根據2010年五區總辭嘅經驗，由議員遞辭職信到正式補選，需時大約係四個月左右，政府預計嚟緊星期三公布政改方案，即係四月廿二號啦，四個月嘅話，咪要去到八月底囉。

補選最快要八月？你懂的

八月底，距離十一月區議會選舉只係三個月時間，如果泛民五月，甚至六月先辭職嘅話，咁日期同區議會選舉就會更近添。「辭職補選」，有嘅係純政治氣氛，市民受到錯誤觀感影響絕對唔出奇，大家仲記唔記得2003年區議會選舉建制派大敗呀？建制派當年輸，絕對唔係因為唔勤力，亦唔係服務唔周到，而係完完全全輸喺政治氣氛之下。

泛民唔識做、唔肯做地區工作，呢樣根本就唔係秘密；而另一方面，區議會作為地區民生事務嘅法定諮詢組織，意識形態同政治理念嘅討論，所佔本比重本來亦唔應該多，偏偏泛民班人冇嘢叻，最叻就係事事政治化。泛民一班大佬心知肚明，愈政治化，對佢哋就愈有利！

為個人政治利益搞「公投」？

以上分析，絕對係有事實根據。唔信？睇返2007年同2011年區議會選舉吖，泛民有邊次係唔係大敗架？2003年贏咗嘅議席嘔晒出嚟唔特止，最終仲「嘔凸」添。點呀？信啦嘛？AV仁同長毛搞「辭職公投」係真心真意爭取普選，而唔係為自己個人同個黨嘅政治利益打算？算把啦！

原圖：takungpao,互聯網